Ibilbide honen ezaugarri nagusia basoak zeharkatzen dituela da. Beraz, BTTa atsegin dutenentzat interesgarriagoa da (lokatza, putzuak,…).

 

Durangoko Madalena plazatik Frantzisko Ibarra kaletik behera, N-634 errepidea gurutzatuko dugu Iurretarantz. Ondoren BI-3341 errepidea hartuko dugu Goiurirantz, baina Iurretako hilerrira iristean, behealdeko eskumako pista hartuko dugu. Ondoren, zuzen jarraitu eta pinudi batera iritsiko gara. Bertan beste bidegurutze bat topatuko dugu, eskumatara hartuko dugu, beti ere, porlanezko pista bati jarraituz. Pinudiko malda gogorra da.

 

Pinudia zeharkatu ostean baserri batzuk daude, ezkerretara egin eta San Juan ermitara helduko gara. Bertan ura edateko aprobetxa dezakegu, ibilbidean ez baitugu iturri asko topatuko.

 

San Juanetik gorantz hartuko dugu eta BI-3341 errepidera iristean, ezkerrerantz joko dugu, Goiurirantz. 900 m egin eta gero, Oiz mendirantz doan porlanezko bidea hartuko dugu eta, 8,8 Km betetzeaz batera, Forestalera iritsiko gara. Hor, Oiz mendira daraman pista utzi eta ezkerreko pistatik behera hartuko dugu.

 

Ondorengo bidegurutzean, eskumako pistatik egingo dugu aurrera. Ondorengo 3 Km-etan, 12. a bete arte, ez dago galtzerik. Pista honetan putzu asko topa ditzakegu eta ibilbide gorabeheratsua da. 12. Km-a betetzen dugunean, ezkerreko pista hartuko dugu beherantz. 12,7 egitean kontuz, ezkerrerantz hartuko dugu, 13,4.a arte. Bihurgunean ezkerretara hartu, jarraian pista utzi eta eskumatara egingo dugu pinu artean (hau lasterbide tekniko polita da). Maumeko baserri batera iritsiko gara eta, haren parean, ezkerretara dagoen bidetxo batetik gora egingo dugu. Ate bi zabaldu ondoren, Maumeko atarirantz gorantz egingo dugu. Maumeko Atarian (14,6 Km), eskumako pista hartuko dugu, eta 15,3. Km-an, berriz ere eskumatara egingo dugu pista zabalagotik Oromiñorantz.

 

19.km-an, Muniketara doan BI-3332 errepidea topatuko dugu eta ezkerretara hartuko dugu, beherantz. Arriandiko industria-gunea pasatu ondoren, Durangorantz abiatuko gara bidegorritik.

Oso ibilbide polita da Oiz eta Mugarra aldetik gabiltzalako. BTT zale amorratuentzat aproposa.

 

Durangoko Madalena plazatik abiatuko gara, Frantzizko Ibarra kalea zeharkatu eta N-634 gurutzatuko dugu Iurretarantz. Behin errepidea gurutzatuta, BI-3341 errepidea hartuko dugu Goiurirantz. Goiuria auzoa atzean utzita, ibilbidearen 5,5 Km-an Forestalera eramango gaituen pista aldapatsua hartuko dugu ezkerretara Forestaleraino.

 

Hor, Oizko errepidea hartuko dugu 9,5. Km-raino eta, hor, bide nagusia utzi eta ezkerretara dagoen pistatxo bat hartuko dugu, Maumeko atarirantz eramango gintuzkeena. Hori utzita, ezkerretara dagoen pista estua hartuko dugu; zati hau nahiko teknikoa da. Ondorengo bidegurutzean, ezkerrerantz, gorantz hartuko dugu eta bi kilometro eta erdian gorabeherak izango ditugu. Ezkerretara eta eskumatara dauden pistak alde batera utziz, zuzen jarraituko dugu ia 12. Km-a bete arte. 12.etik 16,5. Km-ra, Laixiarrera iritsi arte, aukera desberdinak edukiko ditugu.

 

Laixiarretik pista bat hartuko dugu, berriro ere, BI-3341 errepidera eramango gaituena; pista honek hasieran beheranzko joera badu ere, gorabehera asko ditu. BI-3341 errepidea hartzen dugunean, 300 m-ra eskumatara dagoen pista hartuko dugu; lokatz eta putzu asko aurki ditzakegu. Hurrengo bidegurutzean, ezkerretara egingo dugu harrizko aldapa gogor eta labainkor batetik. Aldapa igotakoan, hurrengo bidegurutzean eskumatik abiatuko gara jaitsiera batetik. Jaitsitakoan, berriz ere, eskumatara hartuko dugu. Zuzen jarraitu hurrengo bidegurutzeraino.Hurrengoan, ezkerretara joko dugu; jaitsiera arriskutsu samarra da. Erdi aldera aldapa gogor bat dago, neguan lokatz askorekin igotzeko zaila.

 

Aurrerantz jarraituta Bakixa auzora iritsiko gara. Hor, 23,5. Km-an, baserriak ezkerretara utziko ditugu eta asfaltozko bidea hartuko dugu Muniketarako bidera iritsi arte. Gero, eskumatara egingo dugu, BI-3332 errepidera. Jarraian, 24,9. Km-an, 200 m ingurura ezkerretara hartuko dugu (kontuz errepidea zeharkatzean).

 

Pista estu batean sartuko gara (kontuz txakurrekin), berriz ere, N-634 errepidera iritsi
arte. A-8 autopistaren azpitik pasatu eta, jarraian, N-634 errepidea hartuko dugu Zornotzarantz, baina segituan, 26. Km-an, 200 m-ra gutxi gorabehera, ezkerrerantz hartuko dugu, Bernabeiti auzora joateko (kontuz errepidea zeharkatzean). Trenbidea pasatuko dugu eta bidegurutzean ezkerretara. Aurrera egingo dugu ezkerrean erreka dugularik. Hurrengo bidegurutzean, berriz ere, ezkerretara hartuko dugu eta errekatxo baten gainetik igaroko gara.

 

Kontuz 27,4. Km-an gutxi gorabehera, hiru pista estu topatuko ditugu-eta. Guk erdikoari jarraituko diogu (ezkerrekoa oso aldapatsua da eta eskumakoak urrundu egiten gaitu). Hortik, 27,4. Km-tik ia 29. Km-ra dena gorantz da eta nahiko bide teknikoa topatuko dugu. Gibelatik gora, azkenengo 700 m-ak, harrizko bidetik egingo ditugu, eta eskertzen da. 29. Km-an Marmoladarantz hartuko dugu, baina Landa Ederrara heldu aurretik, 500 m aurrerago, 29,5. km-an, ezkerreko pistatik joko dugu Santa Luziarantz. Santa Luzia pasa eta, 32,9. Km-an, pista nagusi hau utzi eta ezkerretara dagoen pistatxoa hartuko dugu (San Andres ermitara heldu baino lehenago).

 

Dena behera eta zuzen egin ondoren, Orozketara doan BI-4331 errepidera irtengo gara. Hor eskumatara, beherantz, hartuko dugu eta, Santa Apolonia ermita ondotik pasatuta, Durangora iritsiko gara.

Ibilbide honek Urkiolako Parke Naturalera hurbilduko gaitu. Denbora askorik ez dugunerako aproposa da Txakurzuloraino baino ez gaituelako eramaten. Txakurzulotik Mañarira garamatzan pista, nahiz eta apurtxo bat teknikoa izan, oso polita da.

Durangoko Andra Mari Basilikatik abiatuta Ibaizabal Ikastolaraino joango gara. Hor,
Ikastola atzean utziz, aldapa gogor bat igoko dugu Artazola auzorantz.

 

Jarraian (2,2 Km), eskumatara hartuko dugu BI-632arekin paralelo doan bide estu batetik. Abadiñoko txaletetara helduko gara eta,horiek goialdetik zeharkatu, lantegi batera (3,8 Km) iritsi eta gorantz hartuko dugu erromatar bidetik. Horri jarraituz, Mendiolako bidea (4,5 Km) topatuko dugu. Hor, eskumatara, gorantz hartuko dugu eta Mendiolara iristean, aurrera egingo dugu; ezkerretara utziko dugu Sagasta auzorantz doan bidea. Gutxira, Atxarteko harrobietara iritsiko gara (7,2 Km).

 

Zuzen garamatzan pista hartu, bertatik zubi bat pasatu eta malda laburra bezain gogorra igoko dugu. Jarraian, aldapa txikia duen basopista batean sartuko gara, baserri batera daraman pista eskumatara utziz. Ondoren, eskumatara bihurgunea dago eta ezkerretara baserri bi. Maldak pixkanaka gogortzen doaz eta ezkerretara utziko dugu Asuntzara (Pol-Pol) zuzenean garamatzan bidea. Igoera, 180º dituen bihurgune batean amaitzen da, 10,5. Km-an, gutxi gorabehera. Azken malda horretan iturri bat dago. Hortik aurrera zati erosoa da eta Anboto, Alluitz eta Aitxiki mendien bistak ikusteko aukera paregabea izango dugu.

 

Txakurzulora helduko gara (12,8 Km). Hor, errepidera iritsi baino 100 m lehenago,
eskumatara, jaitsiera aldapatsua duen bide bat dago. Bide horrek ere BI-623 errepidera eramango gaitu. Metro batzuk aurrerago (15,3 Km), errepidea utzi eta eskumatara sartuko gara. Bertan, hesi bat dugu, beraz, bizikletatik jaitsi eta makurtuta igaro beharko dugu.

 

Hortik aurrera igotzen segituko dugu mendi pistari jarraituz. 15,5. Km-an igoera bukatuko da eta jaisten hasiko gara. 17. Km-an bidegurutze bat aurkituko dugu eta eskumatara hartu beharko dugu, beherantz. Ia 18. Km-an asfaltozko errepide batera irtengo gara. Metro gutxi batzuk ezkerretara egin eta eskumako bidetxoa hartuko dugu, berriz ere. Dena beherantz, 200 m-ra beste bidegurutze bat aurkitzean, beherantz zuzen doan bidetik joko dugu. 18,8. Km-an BI-623 errepidearekin bat egingo dugu.

 

Errepide horretatik jarraituta, lehenengo Mañaria eta gero Izurtza zeharkatuko ditugu. 22. Km-an dagoen errotondara iristean, eskumatara egingo dugu errepidea ekiditeko eta Tabirara sartzeko. Segituan iritsiko gara Durangora.
 

Ibilbide honek Mugarra aldera hurbilduko gaitu. Laburra (13 Km) izanda ere, asko igotzen dugu (406 m-ko guztira). Beraz, goitik ikusgai izango ditugun paisaiak zoragarriak dira.

 

Durangotik irten eta, Aramotz auzunea zeharkatuz, BI-4331 errepidea hartuko dugu
Orozketarantz.

 

Lehenengo bihurgune itxira iristean, ia 3. Km-ra, ezkerretara dauden etxola artetik pista batdoa. Basoko pista horretatik gora jarraituz, Neberondora doan porlanezko beste pista batera helduko gara.

 

Bidegurutze horretan eskumatara egingo dugu, gorantz. 400 m-ra merendero (4,6 Km) batera helduko gara eta gorantz egingo dugu. Hortik, malda gogorra aurkituko dugu harrizko pista batera heldu arte. Pista horretatik igota Neberondora (6. Km) helduko gara.

 

Horra iristean, antzinako elurtegia ikusiko dugu, baita merendero bat ere, paraje eder batean. Neberondora heltzeko aldapa gogor honen ostean, jaitsiera dator. Merenderoaren atzeko aldetik dagoen bidexka batetik jarraitu eta porlanezko bide batera arte jaitsiko gara; hor, eskumatara hartu eta beherantz segituko dugu Santa Ageda ermitaraino. Ezkerretik bidexka bat dago, ermita gure eskuman utziz; basoko bide polit horri jarraituz Izurtzara (9,5 Km) helduko gara.

 

Hortik, bidetxo horrek BI-623 errepidera aterako gaitu eta, hortik aurrera, Durangorako norabidea hartuko dugu. Errotonda batera heltzean, eskumatara joan, Tabirara, errepide nagusia ekiditeko; horrela, Durango erdialdera helduko gara.